梁思浩重返TVB预咗再遇「世仇」乐易玲：唔原谅我都唔紧要
梁思浩主持有线灵异节目《怪谈》系列长达17年，但他早前却突然宣布退出，更有消息指他获无线（TVB）总经理曾志伟邀请，即将重返娘家担任新节目监制兼主持。梁思浩昨日（10/11）接受《香港01》访问时承认消息属实，亦坦言对《怪谈》、对有线电视感到不舍：「因为签咗保密协议，我返TVB呢个秘密系收埋咗半年，我唔可以同有线讲我咩理由唔可以继续做，而佢哋（有线）一直对我好好，无条件就我时间同人工，我系好难过，甚至系有一个合作咗好多年嘅监制打嚟搵我，『思浩，你保重身体呀，有咩要搵我呀，唔好收收埋埋』，人哋以为我有绝症，我就话，『咩都有可能，唯独我身体冇出现问题。」
梁思浩昨日（10/11）接受《香港01》专访，大谈被炒17年后再重返TVB的感受。（叶志明摄）
点击下图观看8个灵探节目诡异场面，当中包括梁思浩主持的《怪谈》：
3
保密协议到期，终于咩都讲得，梁思浩亦不讳言今次相隔17年再度回巢，与曾志伟有莫大关系，眼见他过去一年对TVB仆心仆命，明显对公司有一份情：「呢一份情我都有，我唔知你有冇试过，个感觉系，你经过你母校，突然间你返番去你刚刚入学嘅岁数，好难去用言语去形容，第二份工、第三份工唔会有呢份情，虽然而家好多嘢改变咗，但系份情系冇改变到。」他又指自己在过去半年激减25磅，只为回复当年离开TVB时的体重：「当日我行出呢个门口有几多磅，我返入去就几多磅，我将自己冇变到咁交番个人返去。」
梁思浩坦言对娘家TVB有一份感情。（叶志明摄）
2004年，TVB大裁员，有份被炒的梁思浩不但怒斥公司无情无义，亦向当时高层陈志云和乐易玲隔空开火：「我做Live show都超过一万小时，但系佢（乐易玲）睇电视都唔知够唔够一万小时」，而他多年亦曾数度追击过乐易玲：「张黑名单喺乐易玲个手袋入面，我同黄日华都返唔到无线，除非等乐易玲唔喺无线做就有机会。」怨气甚深。
梁思浩今次回巢，虽然不会再见到已经离开TVB的陈志云，但仍然有好大机会与乐易玲碰头。怎样面对她？梁思浩坦言三日前致电给一位圈中猛人搭路，希望与乐易玲摆和头酒，并亲口向对方说声对不起：「当年每一个人都有个位置，佢未必想咁做，但系公司要佢咁做，佢身在其位，唔可以唔做，我同佢无仇无怨，只不过系因为佢嘅职位同我有冲突，但我就不停咁闹佢，我而家人大个咗，睇法都唔同，我今日学识咗放下，我系欠佢一个道歉。」
梁思浩曾经多次炮轰乐易玲，而他今次回巢便打算向对方道歉。（叶志明摄）
你肯道歉，别人未必肯原谅，始终当天确实闹得太尽、太不留余地，梁思浩亦承认如果自己是乐易玲，听到他闹得如此狠，也会火上心头：「我都嬲啦，咁闹你，你都唔嬲，圣人咩？（对方唔原谅点算？）唔紧要，咩叫释出善意，就系畀咗先，佢系咪接受，我都释出咗，起码我都有咁大嘅勇气。如果你要在意你嘅勇气有冇结果，你就唔够勇气喇。好多人都觉得，梁思浩咩都够胆讲，咁点解我唔够胆讲『对不起』三个字？」
向来言辞辛辣的梁思浩，或许受最近数年的大环境影响而肯放下身段认低威：「呢几年我同好多香港人都学识包容同埋放下，对样样嘢包容多啲，对样样嘢放下多啲，你个人就会活得自在啲，因为我哋经历咗好多唔同嘅嘢，例如疫情，我哋仲唔放下？咁我哋咪好辛苦？」
梁思浩直认近年心态受大环境影响，逐渐学懂包容和放下。（叶志明摄）
Comentários